Пках тун илю иплотъэн, хлэныт

Ялыстро ялудъы хая…

Ос ту сирт, тэкаран пу фенэт,  -

Киматызи ки жангкаря.

 То яло киматыз укнярка

Ки ту хум  лалашарка глыфт.

О псарас джунатрев ту варка,

Пес ту кима петай ту дъихт.

Пках тун илю ялыз ту кима,

Халыс мега псари петаш…

… Лон т яга мис паенум дъы-мас,

Пу  щадъеви ту хараташ.

Хаширлэвунэ струцка мидъа

Пас ту крию, тымизку хум.

Пках та мавра-с гайтаня-фридъа

Хлыцка мача дранун харшум.

Ксэру : тэк  ас кутэв ту ныхта,

Оло-эна на  ксимерев, -

Тэк ас млонум то севталых-мас,

Оло-эна на билынэв!

Пефт ту плэхтра-с пас та  амблача-с.

Сы нэ лейс ки нэ лалыс,

Ма го идъа с дъыка-с та мача,

Оты ими с олнус вахтлыдъс.

Мэна фенэт-ме: го аплогум

Змонса ола  та лахардэйс,

Моно ксеро го эна лого,

Пую,флаго, на ме то лэйс,   - 

Пую эн ах та ола лоя

 Ас  дъыну-мас-па  акирво,

Пую кани тун ксенус  - соя,

Ки ту зисимо – катыно.

…Тэкаран пушпуриз ту кима,

Тэкаран  хаширлэв ту хум…

Лон т яга мис паэнум дъы-мас,

Хлыцка мача дранун  харшу-м.

Тыхадар чан кутэв ту ныхта,

Эркит ора – на ксимерев,

Тэк ас млонум то севталых-мас,  -

Иртэн ора на билынэв!

                 8-9 ту Септэври 1935